Violante de Aragón (1236-1300), infanta de Aragón, filla de Xaime I o Conquistador e de Violante de Hungría, foi raíña consorte de Castela ao casar con Afonso o Sabio en 1249, cando só tiña 13 anos. Como tardaba en quedar encinta, o rei castelán, pensando que era estéril, quixo que o papa anulase o matrimonio. Finalmente tiveron cinco fillos e sete fillas, unha delas, a infanta Violante de Castela, chamada coma ela.
Violante de Aragón e Hungría, nada en Zaragoza en 1236, foi raíña consorte de Castela por ser esposa de Afonso o Sabio. Era filla de Xaime o Conquistador de Aragón e de Violante de Hungría. Faleceu en Roncesvalles en 1301, e suponse que alí está enterrada. Non obstante, unha tradición asegura que o lugar do enterro foi o mosteiro de Santa Clara de Allariz, que ela fundara en 1268. De feito, un neto dela, o infante Filipe, si está enterrado neste convento. Outra tradición, centrada en Estremadura, fala de que a raíña dona Violante –alcumada “la gallega”– doara aos moradores de Hervás (Cáceres) en 1264 un bosque de castiñeiros para asentar a poboación e que esta puidese criar gando. O souto mantívose para uso público ata o séc. XX, e ben que aproveitou a veciñanza as súas castañas, os seus cogumelos e a súa madeira, base da industria local do moble. Lenda ou realidade, o caso é que hoxe este lugar, declarado paisaxe protexida, conserva o nome de “El Castañar Gallego”.
