Hemeroteca

A Hemeroteca da Real Academia Galega garda máis de 3000 títulos de revistas e xornais publicados ao longo dun período de douscentos anos. De especial importancia é o noso Fondo Histórico de publicacións galegas que reúne cabeceiras tan relevantes como El Idólatra de Galicia, O Vello do Pico-Sagro, A Nosa Terra, ou a revista Nós. Tamén resulta de grande interese o conxunto de revistas americanas editadas polas colectividades galegas que viviron na emigración cubana e arxentina a finais do século XIX e comezos do XX.

A procedencia dos fondos da Hemeroteca é diversa. Algunhas publicacións foron adquiridas pola Real Academia Galega ao longo da súa dilatada historia. Outras proceden do legado deixado por distintos persoeiros relacionados coa nosa institución. Dentro desta categoría inclúense aquelas revistas e xornais que pertenceron a Manuel Murguía, a José Oxea, aos irmáns Antonio e Francisco Mª de la Iglesia, ou ao académico Isidro Parga Pondal. Por último, as publicacións periódicas máis recentes -a maior parte galegas- recíbense actualmente por medio de trocos, doazóns e subscricións.

Consciente do valor destes materiais, a Real Academia Galega está implicada na dixitalización do seu patrimonio hemerográfico coa finalidade de dalo a coñecer e de facilitar a súa consulta pública. Unha parte deste patrimonio pódese consultar directamente na nosa Hemeroteca Virtual. Outros títulos están accesibles en Galiciana. Biblioteca Dixital de Galicia, onde existe un micrositio que reúne as publicacións dixitalizadas procedentes da nosa Hemeroteca.