Guía de nomes galegos

Forma curta do nome Rodrigo, usada na Idade Media cando ía acompañada do apelido.

As formas apocopadas de Rodrigo, Roi e Rui, eran frecuentes na Galicia medieval. Leváronas trobadores do século XIII como Roi Eanes d’Alvares, Roi Queimado, Rui Fernandes e Rui Gomes o Freire.

Pasou á historia como defensor das liberdades do pobo fronte aos grandes señores feudais o fidalgo coruñés Roi Xordo (século XV), veciño de Ferrol, que en 1431 encabezou a primeira guerra irmandiña (a Irmandade Fusquenlla) dos vasalos da comarca das Mariñas contra o seu señor Nuno Freire de Andrade o Mao; os rebeldes irmandiños serían vencidos en 1437 polas tropas conxuntas dos Andrade e do arcebispo compostelán e os seus xefes serían executados, Roi Xordo entre eles.

Rui Vázquez, crego de Santa Baia de Chacín, na Terra de Xallas, é quen asina a copia en galego da Crónica de Santa María de Iria (1468) da catedral de Santiago, fonte que constitúe a información máis directa do acontecido na segunda guerra irmandiña (1467-1469).