Guía de nomes galegos

É un nome medieval de importación franca e orixe etimolóxica xermánica, atestado en documentación galega desde o século X. Está composto pola raíz franca hrôd ‘vitoria, gloria’ e a gótica wulf ‘lobo’.

San Rodolfo de Bourges (século IX) foi primeiro arcebispo desta cidade francesa.

O nome adquiriu popularidade pola sona de personaxes como o actor e bailarín Rodolfo Valentino (1895-1926), estadounidense de orixe italiana.

Rodolfo Ucha (1882-1981), natural de Vigo, un dos máis importantes arquitectos modernistas galegos; desenvolveu a maior parte da súa obra en Ferrol, onde foi arquitecto municipal.

Rodolfo Prada (1892-1980), natural dos Peares (A Peroxa), membro do Partido Galeguista en Buenos Aires, onde estaba emigrado; foi a persoa de máxima confianza de Castelao durante o exilio deste na capital arxentina; asistiuno ata a súa morte (1950) e foi o seu testamenteiro.

Rudolf Diesel (1858-1913), enxeñeiro inventor do motor que leva o seu apelido. Rudolf Nureyev (1938-1993), bailarín ruso.