Guía de nomes galegos

Do latín eclesiástico Angelus, do grego ággelos 'mensaxeiro'. O nome masculino actual talvez proceda do Anxo da Garda, tradición relixiosa popular que afirma a existencia dun anxo custodio ou gardián que guía os pasos e as accións de cada persoa, familia, país ou institución. O nome tradicional galego leva acentuación grave (Anxelo e Anxela), de forma anómala con respecto á súa etimoloxía (como si conservan o portugués Ángelo e o castelán Ángel). Posiblemente a partir de diminutivos como Anxeliño, Anxeluco (ou outros) supúxose un primitivo Anxelo, ao considerarse que a terminación -elo era un diminutivo, como o presente en formas como Carmela, Lela, Nela. A partir das últimas décadas do século XX fíxose moito máis popular a tradución do substantivo común, Anxo, que chegou a estar no índice dos nomes máis frecuentes nas últimas décadas. As variantes Xelo e Xela tamén se independizaron como nomes, sobre todo a forma feminina.

Ánxel Fole (Lugo 1903 - 1986) e Xela Arias (Sarria 1962 - Vigo 2003); homenaxeado o primeiro co Día das Letras Galegas de 1997 e a segunda co de 2021.

Ánxel Casal (1895-1936), impresor e político natural da Coruña; na súa editorial Nós (1927-1936) publicou a maior parte da literatura galega da época; encarcerado polos sublevados no golpe de Estado de 1936, foi asasinado en Cacheiras (Teo) o 18 de agosto deste ano.

No eido da ciencia, Ángela Ruiz Robles (León 1885 - Ferrol 1975), mestra e pedagoga que en 1949 inventou unha especie de prototipo de libro mecánico.