De orixe toponímica, é o nome dunha serra situada no suroeste da provincia de Ourense, entre Galicia e Portugal (onde se chama O Gerês); a zona foi declarada Parque Natural da Baixa Limia-Serra de Xurés en Galicia e Parque Nacional de Peneda-Gerês en Portugal, dunha gran riqueza natural, paisaxística, etnográfica e arqueolóxica. O nome é de orixe prerromana, documentada no itinerario de Antonino como Aquis Oreginis ou Aquis Originis, e mais tarde como monte Ugeres (1096), rio Caldo subtus Ogeres (1100). O artigo actual resulta da deglutinación da vogal inicial que primitivamente contiña o topónimo. En última instancia está formado pola raíz hidronímica paleoeropea *wegw- ‘húmido, mollar’.
