É un nome con certa presenza na comarca de Fisterra. A Virxe da Xunqueira é a patroa de Cee. Segundo unha tradición local, apareceu nunha xunqueira da ría unha imaxe de madeira da Virxe, que seguramente fora tirada ao mar por algún barco en apuros. Déronlle o nome de Virxe da Xunqueira ou A Aparecida e naquel sitio construíron unha ermida, que co tempo se convertería nunha igrexa dedicada a Santa María.
En época baixomedieval conviviron en terras do actual concello de Cee dúas parroquias: unha interior, San Paio de Refoxos, e outra litoral, Santa María da Xunqueira, que foi a que se acabaría impoñendo a partir do século XVI unha vez que a veciñanza xa lle perdera o medo aos perigos que viñan do mar. O moderno hospital comarcal de Cee tomou o nome de Hospital Virxe da Xunqueira.
