Xulieta é con Romeu a protagonista dunha historia difundida por W. Shakespeare nunha traxedia (Romeo and Juliet) estreada en 1594, pero que xa era coñecida na antigüidade clásica, e mesmo Dante tivera coñecemento dela.
Na obra shakespeariana, unha moza e un mozo da cidade de Verona, pertencentes a familias rivais —os Capuletos e os Montescos—, namóranse e atopan a oposición dos seus pais e familiares. A trama, que remata coa morte dos amantes, inspirou numerosos compositores como Benda, Zingarelli, Bellini, Berlioz, Strauss ou Prokofiev, e a cineastas como Cukor, Robert Wise ou Zeffirelli.
