A pesar de ser un nome levado por un apóstolo, Xudas Tadeu non tivo difusión pola súa coincidencia con Xudas Iscariote, o traidor a Xesús. O nome víñase utilizando popularmente nas maldicións (“voto a Xudas” ou “voto a Xuncras”; “Xudas / Xuncras me valla”) e nos insultos: chamarlle “Xudas” a alguén é consideralo un traidor.
No Antigo Testamento houbo tamén un Xudas Macabeo, que a mediados do século II a. C. encabezou unha rebelión xudía contra o rei seléucida Antíoco IV Epifanes de Siria. Foi a revolta dos Macabeos, fillos do sacerdote Matatías, considerados heroes polos xudeus. Fálase dela no Libro dos Macabeos.
