Guía de nomes galegos

Do hebreo, diminutivo de xamax 'Sol', polo tanto 'pequeno Sol' ou ben 'fillo do Sol'. Chegou a nós a través do grego Samsón e do latín Samson (ou Sampson). A Biblia di realmente Simsôn pero como o texto orixinal non escribía as vogais, a restauración da vogal por i considérase hoxe errada.

Na Biblia, Sansón foi un dos xuíces de Israel, dotado dunha forza extraordinaria. Encarna a loita dos israelitas contra os filisteus, os primeiros ocupantes de Palestina. A filistea Dalila, coa que casou, conseguiu saber que o segredo da súa forza radicaba no seu cabelo, e cortoullo mentres durmía (na antigüidade rapar un guerreiro era humillalo). Entregado despois aos filisteus, estes cegárono e atárono ás columnas do seu templo, que acabou derrubando unha vez que lle volveu medrar o pelo. A figura de Sansón evoca en certos aspectos o Heracles grego. A historia de Sansón e Dalila inspiraría moitas obras escultóricas e pictóricas, literarias e musicais.