Guía de nomes galegos

Plural de Santo, do latín Sanctus, participio do verbo sancio, termo da linguaxe relixiosa e política que significa 'facer sagrado ou inviolable, establecer solemnemente', e de aí, 'ratificar, sancionar'. Coa chegada do cristianismo sanctus pasa de 'consagrado a Deus, venerable' a 'home que pola súa perfección participa de certas prerrogativas divinas e que algunhas igrexas cristiás elevan ao culto dos altares', isto é, 'santo'. Curiosamente este nome funciona como singular, aínda que o seu significado alude á colectividade dos santos anónimos. É un nome que tamén corre como apelido.

Santos Juliá (1940-2019), historiador natural de Ferrol, autor de bo número de traballos sobre a historia política e social de España durante o século XX.