Guía de nomes galegos

Do hebreo sarah 'princesa'. O personaxe bíblico que levaba este nome chamábase orixinalmente Sarai 'controvertida', e máis tarde foi chamada Sarah, xa que, segundo o relato bíblico, se había de converter en nai de moitos reis, e logo o seu nome latinizouse en Sara.

Na Biblia, Sara era a muller do patriarca hebreo Abrahán, quen, debido á súa infertilidade, lle ofreceu ao seu home como concubina a súa escrava exipcia Agar, para que puidese ter descendencia. De Agar naceu Ismael, considerado o pai do pobo árabe. Finalmente, por intervención divina, a anciá Sara puido concibir un fillo do xa case centenario Abrahán, que se chamará Isaac.

Sara Leirós Fernández (1897-1978), mestra, membro do Seminario de Estudos Galegos.

Sarah Bernhardt (1844-1923), actriz de teatro francesa e tamén dos primeiros anos do cine mudo; tivo gran popularidade no París de fins do século XIX e principios do XX; reputados artistas modernistas inmortalizárona nos seus carteis.