Guía de nomes galegos

Nome dun deus da mitoloxía romana equivalente ao Krónos grego. Talvez deriva do adxectivo latino satur 'farto, saciado, saturado', porque este deus devoraba os seus fillos nada máis naceren por medo a que o destronasen.

Segundo a mitoloxía romana, o deus Saturno ensinoulles aos homes a agricultura, dándolles unha etapa de gran prosperidade. Na súa honra celebrábanse en Roma as Saturnalia, festas en que se interrompía a actividade militar e as execucións, os criados eran servidos polos señores etc.; o mundo ao revés. Era como volver ao paraíso perdido da felicidade e da igualdade. Os romanos dedicábanlle o último día da semana, Saturni dies, herdado polo Saturday dos ingleses; nós herdamos o sábado xudeocristián (< hebreo shabat ‘repouso’).