Guía de nomes galegos

Nome árabe, Salah al-Din 'a pureza da fe', latinizado en Saladinus, de relativa frecuencia en Galicia.

Difundiu este nome Saladino I (1138-1193), curdo que chegou a conquistar un grande imperio no Oriente Medio, a cidade de Xerusalén e o seu territorio incluídos (1187). O feito de lles arrebatar Terra Santa aos cruzados, rematando así co reino de Xerusalén, provocou a organización da terceira cruzada, liderada por Filipe Augusto de Francia e Ricardo Corazón de León de Inglaterra. Estes reis só conseguiron conquistar Acre e non tiveron máis remedio que pactar con Saladino (1192), a quen lle deixaron Siria e Palestina, incluída Xerusalén. O sultán Saladino impresionou moito os cristiáns pola súa tolerancia, pois, a pesar de ser profundamente musulmán, respectaba outras crenzas. Esta actitude cabaleiresca deu lugar a un ciclo de lendas que o convertían nun heroe.