Guía de nomes galegos

Do hebreo Xelômôh, a través do latín eclesiástico Salomon 'amante da paz, feliz', de xâlôm 'paz, saúde, felicidade'. De aquí procede tamén o nome persoal árabe e turco Sulaymân (Solimán).

No Antigo Testamento, Salomón, fillo de David e Betsabé, foi o terceiro dos reis de Israel. Reinou catro décadas, entre o 965 e o 928 a. C. Aínda que a súa ascensión ao trono estivo precedida do asasinato do seu irmán maior, Adonías, e do sacerdote Abiatar que o apoiaba, Salomón non foi un rei guerreiro como o seu pai, pois preferiu pactar con poderosos monarcas veciños, como Hirán de Tiro e o faraón de Exipto. Deixou sona pola súa sabedoría (lémbrese o famoso “xuízo de Salomón”), pero ao final do seu reinado tamén cometeu flagrantes inxustizas, por iso os profetas anunciáronlle que en castigo o reino se dividiría á súa morte, como así foi (a causa parece ser que fora dar preferencia á obtención de riquezas fronte ao culto a Iavé). Mandou construír murallas arredor de Xerusalén e tamén o famoso templo que levou o seu nome.

Atribúenselle tres libros da Biblia: o Cantar dos cantares, os Proverbios e o Libro do Eclesiastés. Un dos episodios máis coñecidos da súa vida foi a súa relación coa raíña de Saba; na tradición da Igrexa ortodoxa etíope asegúrase que tivo un fillo con ela, chamado Menelik I, que sería o futuro rei de Etiopía. O filme de 1959 Solomon and Sheba (“Salomón e a raíña de Saba”), de King Vidor, fixo popular esta hipotética relación sentimental.

O poeta e filósofo hispanoxudeu Ibn Gabirol (1020-1058) ou Avicebrón (na súa forma latinada) chamábase en realidade en hebreo Shlomo ibn Yehuda ibn Gabirol. As súas ideas cosmolóxicas e metafísicas, coñecidas a través de versións latinas, foron defendidas ou rebatidas por unha restra grande de filósofos europeos posteriores.

Noutra orde de cousas, as illas Salomón do océano Pacífico foron descubertas en 1586 polo navegante galego Álvaro de Mendaña; el bautizounas con outros nomes, pero finalmente acaboulles quedando o nome actual polo desexo que moitos conquistadores españois da América tiñan de atopar en oriente as minas do rei Salomón.