Guía de nomes galegos

Do topónimo francés Salette, diminutivo de Sale, que ten a mesma orixe có galego Sa (ou Saa), o xermánico *sala, de significado dubidoso, quizais ‘casa importante’.

Nome derivado dun santuario en honor á Virxe situado na vila francesa de La Salette-Fallavaux, na rexión do Ródano-Alpes. As súas orixes están nunhas supostas aparicións da Virxe María neste lugar, o 19 de setembro de 1846, a dous pastores de 15 e 11 anos, respectivamente. Segundo estes rapaces, a Virxe dirixírase a eles en francés e tamén en occitano (idioma non oficial), e confioulles uns segredos que o bispo de Grenoble lle enviou ao papa Pío IX en 1851. Cinco anos despois o papa recoñecía a autenticidade das aparicións e aprobaba a devoción á Nosa Señora da Saleta. Anos despois, a 1880 m de altitude, construíuse un gran santuario que se converteu nun lugar de peregrinación. Estas aparicións gardan moita semellanza coas de Lurdes que terían lugar en 1858, tan só doce anos despois. En París tamén se construiría, entre 1963 e 1965, un gran templo dedicado a Nôtre Dame de La Salette.

En Galicia réndese culto á Nosa Señora da Saleta nos concellos de Coristanco, Silleda, Boborás e San Cristovo de Cea.

Salette Tavares (1922-1988), escritora, poeta e ensaísta portuguesa, coñecida principalmente pola súa poesía visual.

Saleta Goi García (1932-2022), libreira, presidenta desde 2007 da Fundación Manuel María de Estudos Galegos, sita desde 2013 en Outeiro de Rei, na casa natal do escritor, convertida en museo.