Guía de nomes galegos

Do francés Genièvre, da forma anglonormanda Guenièvre, á súa vez do galés Gwenhwyfar, composto polas raíces célticas gwen ‘branco’ e unha segunda parte que se ten posto en relación con ‘escuma’ ou con ‘fantasma, ser máxico, elfo’.

Nas lendas artúricas ou do ciclo bretón, Xenevra era a muller do rei Artur de Britania, a quen lle foi infiel, pois tivo amores con Lanzarote (ou Lancelote), o máis fermoso, cortés e valente dos cabaleiros da Táboa Redonda. A lenda asocia a infidelidade de Xenevra coa caída do reino de Camelot, e tamén se considera un símbolo da fraxilidade da condición humana. Segundo a lenda, está será a causa principal do final do reino de Britania, invadido por anglos e saxóns no século V. En todo caso, a difusión do nome de Xenevra deberase á popularidade dos libros de cabalaría a finais da Idade Media.