Guía de nomes galegos

De orixe xermánica e procedencia francesa, documentado nos textos galegos desde o século XIV. Está composto polas raíces góticas *ger ‘lanza’ e hardus ‘duro, forte’, moi frecuente na antroponimia franca pero escaso na gótica. É un nome semellante a outro máis tradicional en galego, Xiraldo, polo que os resultados puideron chegar a confluír.  

San Xerardo Sagredo de Budapest (séculos X-XI), veneciano, apóstolo e protomártir do cristianismo húngaro. Fora chamado polo rei santo Estevo de Hungría para educar o seu fillo. Martirizárono os pagáns en Buda (1046). É patrón de Budapest.

San Xerardo de Monza (séculos XII-XIII), fundador dun hospicio para indixentes nesta cidade italiana. Cóntase que permaneceu en oración durante unha noite enteira nunha igrexa coa promesa de lle dar cereixas ao sancristán (de aí que se represente na arte cun ramallete de cereixas na man). É padroeiro de Monza.

Xerardo Álvarez Limeses (1871-1940), mestre e escritor natural de Pontevedra. Académico correspondente da RAG, pertenceu á sección de Historia do Seminario de Estudos Galegos e foi cofundador e vicedirector do Museo Provincial de Pontevedra.

Xerardo Fernández Albor (1917-2018), médico e político natural de Santiago. Foi o primeiro presidente da Xunta de Galicia entre 1982 e 1987, tras a aprobación do Estatuto de Autonomía de Galicia de 1981.

Xerardo Moscoso Caamaño (1945-2021), natural da Cidade de México, fillo de galegos. Estudou Medicina na Universidade de Santiago e participou na fundación de Voces Ceibes (1968), colectivo de cantautores en galego críticos coa ditadura franquista.

Gerardo Diego (1896-1987), profesor e poeta español pertencente á xeración de 1927.

Gerard David (c. 1460-1523), pintor flamengo de estilo gótico, o principal da cidade de Bruxas da súa época.