Guía de nomes galegos

Do latín Hieronymus, que procede do grego Hierṓnymos, composto de hierós 'sagrado' e ónoma 'nome'; polo tanto significa 'nome sagrado'.

San Xerome (347-420) foi un dos principais doutores da Igrexa. Naceu en Dalmacia e estudou en Roma. A súa erudición levouno a estudar a lingua hebrea mentres vivía no deserto de Siria. Foi secretario do papa san Dámaso e a el se debe a tradución da Biblia do grego ao latín, denominada a Vulgata (420). Foron onda el en busca de información dous teólogos galaicos: Avito e Paulo Orosio. A Lenda dourada de Jacopo della Voragine, unha compilación de vidas de santos moi difundida a partir do século XIII, presenta tres temas populares referidos a el: a súa flaxelación, as tentacións ou soños lascivos no deserto e o episodio do león domado; os tres foron moi representados por mestres pintores de todos os tempos.

O pintor holandés Jheronimus ou Hieronymus Bosch (1450-1516), adaptado como ‘o Bosco’ no noso idioma.

Jerónimo del Hoyo (séculos XVI-XVII), cóengo da catedral de Santiago coñecido polas súas Memorias del Arzobispado de Santiago (1607), manuscrito cun rico repertorio de notas descritivas de todas as parroquias do Arcebispado compostelán, resultado do seu labor como visitador xeral.

Jerónimo Macho Velado (1826-1899), naturalista da Universidade de Santiago.

O xefe apache Gerónimo (1829-1909), heroe indíxena amerindio que entre 1858 e 1886 loitou en defensa do seu pobo contra os exércitos mexicano e estadounidense.