Santa Xenoveva de París (século V) naceu na cidade francesa de Nanterre. Tras a morte dos pais entra nun convento en París. Segundo a tradición, Xenoveva animou o pobo a combater o exército do huno Átila, que ameazaba París, e logrou que este se retirase sen atacar a cidade. A santa gozou en vida de enorme prestixio e contribuíu á cristianización dos francos e doutros pobos xermánicos.
Tamén tivo moita sona santa Xenoveva de Brabante, na actual Bélxica, lendaria heroína popular. A Lenda dourada (unha compilación de vidas de santos moi difundida a partir do século XIII) de Jacopo della Voragine recolle a súa historia: era filla do duque de Brabante e fora repudiada polo seu home debido a unha falsa acusación de adulterio; viviu soa nunha fraga co seu fillo, alimentados por unha corza, ata que se recoñeceu a súa inocencia.
