Guía de nomes galegos

Nome grego antiquísimo, Timótheos, que levaron moitos gregos ilustres. Composto de timân 'honrar, respectar' e theós 'deus': 'que honra a Deus', a través do latín Timotheus.

Este nome foi moi usado polos primeiros cristiáns, polo seu significado, apropiado para un culto monoteísta. Levárono moitos santos e mártires dos primeiros tempos, como san Timoteo de Éfeso (século I), natural de Listra, na actual Turquía, un dos grandes colaboradores de san Paulo, a quen acompañou en varias das súas viaxes. É citado en varias epístolas paulinas, e parece que foi o destinatario da Primeira e da Segunda epístola a Timoteo, relacionadas coa disciplina eclesiástica, das que se discute se foron do de Tarso ou posteriores.