Guía de nomes galegos

Do latín Tiberius 'procedente do Tíber', derivado de Tiberis, nome do romano río Tíber.

Tiberio Xulio César Augusto foi o segundo emperador romano, sucesor de Octavio Augusto; gobernou do ano 14 ao 37. Era fillo de Tiberio Claudio Nerón e de Livia Drusila e pertencía á gens Claudia. A súa nai divorciouse do seu pai e casou con Augusto. Tiberio casou con Xulia, filla do emperador, e foi adoptado por este. Na súa mocidade fora un dos grandes xenerais de Roma e sentara as bases da fronteira norte do imperio. En parte polas intrigas da súa nai, Augusto nomeouno sucesor, pero a el seica nunca lle apeteceu o cargo, e pasou á historia como un sombrío gobernante, sempre moi solitario. Ao principio gobernou con siso, pero despois sufriu rebelións das lexións do Danubio e mesmo do xefe da súa garda pretoriana. Autoexiliouse na illa de Capri e desde alí gobernou o imperio ata a súa morte; antes escolleu a Calígula como o seu sucesor. Durante o seu imperio tivo lugar en Palestina a vida pública, o proceso e a execución dun xudeu chamado Xesús de Nazaré.