Guía de nomes galegos

Do latín Paulus 'pequeno', de Paullus, cognome romano talvez derivado dun alcume que un membro da gens Aemilia merecía pola súa baixa estatura. En Galicia o nome medieval orixinou os topónimos Pol e Poi, a partir do xenitivo (Pauli).

San Paulo (século I) era xudeu, naceu en Tarso e naturalizouse romano. Recibiu na circuncisión o nome de Saúl (‘desexado’), que levara o primeiro rei de Israel. No primeiro período da súa vida foi un fariseo radical encarnizado perseguidor dos cristiáns; mesmo participou ou estivo presente na lapidación de santo Estevo. Non obstante, cambiaría totalmente coa famosa “caída do cabalo” no camiño de Damasco e pasaría de ser perseguidor a propagador do cristianismo. Adoptou o nome de Paulo (‘pequeno’) e dedicou toda a súa vida a levar a doutrina cristiá por cidades do Imperio romano: pola súa apertura á prédica do Evanxeo aos non xudeus —ao contrario de san Pedro— foi considerado o segundo fundador do cristianismo e chamado o Apóstolo dos Xentís.

Paula é unha personaxe do drama A fonte do xuramento de Francisco María de la Iglesia.

O escritor galaicorromano dos séculos IV-V Paulo Orosio, e, en tempos máis recentes, pintores como o italiano Paolo Veronese (1528-1588), os franceses Paul Gauguin (1894-1903) e Paul Cézanne (1839-1906), o alemán Paul Klee (1879-1940) e o español Pablo R. Picasso (1881-1973); escritores como o francés Paul Verlaine (1844-1896) e o chileno Pablo Neruda, pseudónimo de Neftalí Reyes Basoalto (1904-1973), Premio Nobel de Literatura de 1971; actores como Paul Newman (1925-2008); músicos como o catalán Pau Casals (1876-1973). O ferrolán Pablo Iglesias Posse (1850-1925) foi o fundador do PSOE (1879) e do sindicato UGT (1888).

Paula Hertwig (1889-1983), bióloga e política alemá. A súa investigación centrouse nos efectos da radiación na saúde.