Guía de nomes galegos

Do latín Petrus, forma masculina de petra 'pedra, rocha'. No Evanxeo (Xoán I, 42), Xesús dille ao irmán de Andrés: "Ti es Simón, fillo de Xonás, pero serás chamado Kefas". Kefas é 'pedra' en arameo e pasou a Petros na tradución grega e Petra na latina; posteriormente estimouse oportuno masculinizar o nome en Petrus.  Este nome deu lugar ao apelido Pérez.

San Pedro (século I) era un pescador de Cafarnaún no lago de Xenezaré; xunto co seu irmán André foi o primeiro dos doce apóstolos de Cristo, que foi quen lle impuxo o nome, pois el chamábase Simón. Tras a desaparición do seu mestre viviu en Xerusalén ata que o prendeu Herodes Agripa. Despois marchou á capital do Imperio, Roma, onde se converteu no seu primeiro bispo. De novo preso, Nerón mandouno crucificar, segundo a tradición no lugar onde despois se erguería a igrexa de San Pedro do Vaticano, pois tamén se considera o primeiro papa da Igrexa católica.

En Galicia este nome tivo moito uso xa desde os tempos medievais, pois levárono santos como Pedro de Mezonzo (930-1003); poderosos señores como o conde Pedro Froilaz de Traba (século XII), o mariscal Pedro Pardo de Cela ou Pedro Álvarez de Soutomaior ‘Pedro Madruga’, conde de Camiña (os dous do século XV); trobadores, segreis e poetas do século XIII en lingua galega como Pero D’Ambroa, Pero Meogo ou Pero da Ponte. Na Idade Moderna, o pontevedrés Pedro Sarmiento de Gamboa (1532-1592) foi un importante navegante e descubridor, autor do máis detallado recoñecemento do estreito de Magalhães da súa época (1579-1580).

Entre os famosos de todo o mundo: Piero della Francesca (1406-1492), pintor italiano; Peter Paul Rubens (1577-1640), pintor flamengo; Pierre Corneille (1606-1684), dramaturgo francés; Pedro Calderón de la Barca (1600-1681), dramaturgo español; Piotr Chaikovski (1840-1893), músico ruso; Pierre Curie (1859-1906), francés Premio Nobel de Física de 1903 xunto á súa muller Marie; Pier Paolo Pasolini (1922-1975), cineasta e escritor italiano.

Petra Karin Kelly (1947-1992) foi unha política e activista ecofeminista verde alemá, membro fundador do Partido Verde Alemán, o primeiro en acadar unha importancia respectable no mundo.