Guía de nomes galegos

O nome de Pascua procede do latín pascha, e este do grego paska, derivado do hebreo pesaj, que significa “coxear”, e que se relaciona con remotísimas cerimonias equinocciais en que se choraba a divindade morta no inverno e se exaltaba a súa resurrección na primavera.

Rexistramos en Galicia este nome polo menos desde o século XVIII, en partidas de bautismo, de matrimonio, de defunción e noutro tipo de documentos, como no Catastro de Ensenada (1753), en mulleres viúvas ou solteiras consideradas “cabos de casa”. Documéntase tamén ao longo dos séculos XIX e XX.

Nome de día que habitualmente se lles poñía ás nenas que nacían por volta do domingo de Pascua ou de Resurrección, que marca o remate da Semana Santa e que constitúe a festa central do cristianismo segundo os evanxeos canónicos, pois  conmemora a resurrección de Cristo.