Segundo a mitoloxía grecolatina, Pandora foi a primeira muller. No principio dos tempos, todo era paz e felicidade entre os homes. Zeus encargoulle a Hefesto que fabricase unha muller de barro á imaxe das deusas. Atenea vestiuna e as Grazas enxoiárona. Epimeteo casou con ela e Zeus deulle un regalo secreto nunha caixa, que un día Pandora decidiu abrir, a pesar de que o tiña prohibido, para saber o seu contido. Cando Pandora ergueu a tampa da caixa misteriosa espalláronse polo mundo todas as pragas e males que alí estaban encerrados. O mito ten evidentes paralelismos co bíblico do paraíso e o pecado orixinal de Eva.
