Guía de nomes galegos

Do grego Pankrátios 'todopoderoso', de pán 'todo' e krátos 'forza', 'poder', elemento este que aparece en nomes como Hipócrates, Polícrates, Sócrates ou en demócrata.

San Pancracio, orfo de pais, foi da Frixia a Roma, onde o papa Cornelio o convertería ao cristianismo. Sufriría martirio na persecución de Diocleciano (303-304).

É un dos protagonistas da novela Fabiola ou a Igrexa das catacumbas (1854), do cardeal inglés Nicholas Wiseman. Invocábase antigamente contra os falsos testemuños, e na actualidade para atopar traballo ou para conservalo.  

Dr. Pancrácio é un dos protoheterónimos do escritor portugués Fernando Pessoa, que empregou na súa mocidade como contacontos, poeta e creador de charadas.