Guía de nomes galegos

Do nome e xentilicio latino Ovidius 'pegureiro, pastor de ovellas', derivado do tamén xentilicio e nome Ovius, que á súa vez procede do nome común latino ovis 'ovella'.

Publio Ovidio Nasón (43 a. C.-17 d. C.) foi un poeta latino, considerado unha das grandes figuras da literatura universal. No ano 8 d. C. foi acusado de inmoralidade pola publicación da súa Ars Amandi (‘Arte de amar’) e o emperador Augusto desterrouno á costa do mar Negro, da que nunca regresaría.

Fálase tamén dun santo catacumbal romano dese nome; as súas reliquias foron trasladadas por un conde francés en 1665 á igrexa do convento dos capuchinos de París, onde estiveron ata que se derrubou o templo en 1806. En Francia invocábase este santo contra os males dos ouvidos, ao asociarse o seu nome co verbo latino audire ‘ouvir’; tamén se dá esta invocación en Portugal nun santo Ovidio que ao parecer foi o terceiro bispo de Braga.

O pintor romántico Ovidio Murguía Castro (1871-1900), fillo de Manuel Murguía e de Rosalía de Castro e membro da chamada Xeración Dorida de pintores, pois os seus integrantes morreron moi novos e case a un tempo no derradeiro terzo do século XIX.