Guía de nomes galegos

Do nome persoal hebreo No'omi, que probablemente significaba 'a miña delicia', ou 'Deus é ledicia, Deus é amor', derivado do substantivo común no'am 'alegría, delicia'. O nome pasou ao grego como Noemín e ao latín como Noemi.

Segundo o Libro de Rut (século IX a. C.) da Biblia, Noemí era esposa de Elimélec, de quen tivo dous fillos. Nunha época de fame, a familia decidiu emigrar de Belén ao país de Moab, onde morreu Elimélec. Os dous fillos casaron con dúas mulleres moabitas (Orpah e Rut), pero tamén morreron. Noemí regresou a Belén e díxolles ás súas noras moabitas que podían volver coas súas familias, pois ela xa non tiña nada que lles ofrecer. Orpah quedou en Moab pero Rut empeñouse en acompañala para vivir con ela en Israel, onde a sogra lle concertaría un bo casamento co rico propietario Boaz.

Carolina Noémia Abranches de Sousa Soares (Maputo, 1926-2003) foi unha escritora e xornalista mozambicana.