Guía de nomes galegos

Do nome persoal hebreo Noah, posiblemente derivado de niham 'aliviar'. O seu posible significado é 'apracible, de bo xacer, manso'. Tamén se ten dito que este nome significaría 'de longa vida', en alusión ao patriarca bíblico, supervivente do diluvio, ou mesmo 'repouso, descanso', polo invento do viño, que se lle atribúe ao  mesmo personaxe e que permitiu ao home descansar. O nome hebreo pasou ao grego como Noé e ao latín como Noe.

Segundo a Biblia, Noé é un dos patriarcas do pobo hebreo, neto de Matusalén e fillo de Lamec. Considerando que a raza humana estaba enviciada, Iavé decidiu exterminala inundando a Terra. O único home xusto era Noé, polo que decidiu que só o salvaría a el e ao seu clan, e para iso ordenoulle construír unha xigantesca arca de madeira, onde entrarían os membros da súa familia e unha parella de animais de cada especie. Despois, Deus mandou chover sen parar durante corenta días e corenta noites ata inundar todo o planeta. Foi o chamado diluvio universal, lenda que existiu en moitas culturas antigas, maiormente nas mesopotámicas.

Noé, como patriarca bíblico, tamén aparece na historia mitolóxica de Galicia, pois atribuíuselle a el a fundación de Noia (antiga Noega ou Noela) durante unha visita que fixo para ver os descendentes de Túbal, o mítico primeiro poboador da Península Ibérica. O escudo da vila noiesa leva como motivo principal a arca de Noé.

O gran lexicógrafo norteamericano Noah Webster (1758-1843); aínda hoxe o Webster (1828) é o dicionario máis popular nos Estados Unidos, de aí que o seu apelido se convertese en sinónimo de “dicionario”. Tamén é recoñecido como pai da escolarización no seu país.