Guía de nomes galegos

Esta forma considerouse o nome antigo da actual vila de Noia, porque aparece citada nos manuscritos que transmitiron a obra do historiador romano Plinio. O problema é que tamén aparecen outras variantes, como Noeta, Noeca ou Noega. Só Nóega e Nóela (con acento no o) poden ser antecedentes da forma moderna, dado que non é posible que as outras evolucionen foneticamente para resultar Noia. En todo caso, esta forma tivo unha certa difusión, e mesmo nalgún mapa antigo (do século XVI) aparece rexistrada así, Noela. Na mitoloxía da vila ponse en relación con Noé, o seu presunto fundador, e de feito no seu escudo figura unha arca. Segundo esta lenda, Noela era a esposa do seu fillo Xafet. Por outro lado, considerouse o feminino de Noel e, daquela, sería unha variante de Noelia.