Guía de nomes galegos

Nome bíblico do Antigo Testamento; procede do hebreo D'lilah, de discutida significación, aínda que hai quen propón 'pobreza' como a máis probable.

Dalila, segundo a Biblia, era unha fermosa muller de quen se namorou Sansón, un dos xuíces hebreos, famoso pola súa forza. Os xefes filisteos subornárona para que traizoara o seu amante. Sabedora de que a forza de Sansón residía no cabelo, adormeceuno e cortoulle as sete guedellas da cabeza. Privado da súa forza, o heroe hebreo foi feito prisioneiro polos seus inimigos, pero acabou con eles cando lle volveu medrar o pelo.

A partir de 1968 o cantante galés Tom Jones puxo de moda a canción Delilah (Dalila). Na versión orixinal en inglés nárrase un crime machista.