Guía de nomes galegos

Nome hebreo composto do substantivo dayâm 'xuíz' ou, mellor, do perfecto do verbo dan 'xulgar', e mais -el, forma abreviada de Elohim 'Iavé', 'Deus'. No primeiro caso significaría 'Deus é o meu xuíz'; no segundo 'Deus xulgou'.

Na Biblia, Daniel é un dos catro grandes profetas maiores, xunto con Isaías, Xeremías e Ecequiel. No Libro de Daniel, compilación serodia, talvez feita no século II a. C., exhórtase os hebreos á resistencia fronte a outros pobos opresores. A cronoloxía do profeta é contraditoria, pois uns sitúano no século VI a. C. —en Babilonia, baixo Nabucodonosor— e outros no século II a. C.

No Pórtico da Gloria da catedral de Santiago, o mestre Mateu representouno cun aspecto optimista, sorrindo: o arquetípico ‘sorriso de Daniel’, que mesmo deu nome a unha coñecida asociación galega de amigos do románico.

Foi o segundo nome de Alfonso Daniel Rodríguez Castelao (1898-1950), que sería o máis usado pola familia e polos amigos.

O escritor inglés Daniel Defoe (1660-1731), autor da novela Robinson Crusoe.

Daniela Núñez Bachiller, nada en Valladolid en 1902, foi a primeira médica en exercer na Coruña.