Guía de nomes galegos

Do grego Dámasos, nome dun heroe da Ilíada de Homero. Da raíz do verbo damân 'dominar'.

San Dámaso (306-384) foi papa do 366 ao 384, talvez orixinario da Gallaecia bracarense; sería, polo tanto, o único papa galaico da historia: Castelao inclúeo na cabeceira da súa Alba de Gloria (1948), unha Santa Compaña de inmortais personaxes galegos, encabezada por Prisciliano, na cal o papa aparece ao lado do emperador Teodosio o Grande. Cóntase que este papa tivo gran sensibilidade artística e literaria, pero tamén que se comportara con crueldade contra os herexes; seica tanto el como o emperador Máximo, tamén posiblemente galaico, conspiraron para que o seu paisano Prisciliano fose decapitado en Tréveris. Apoiou a san Xerome na tradución da Biblia ao latín (a Vulgata).

Dámaso Alonso (1898-1990), escritor e filólogo natural de Castropol (Asturias), presidente da Real Academia Española de 1968 a 1982, académico de honra da RAG, e primeiro filólogo en clasificar a fala do Eo-Navia do occidente de Asturias como galega.