Guía de nomes galegos

Nome cristián-romano, de orixe grega: Khristophóros 'portador de Cristo', 'o que leva a Cristo', composto de Khristós 'Cristo' e phereín 'portar', 'levar'.

San Cristovo é un santo dos chamados extravagantes, eliminado do Calendario Romano tras a reforma litúrxica do Concilio Vaticano II (1965). Así e todo, consta como un dos máis antigos do culto hispánico (século VII) e a súa festa séguese celebrando con gran pompa, dado que é o patrón dos condutores.

A súa lenda procede do século XI: Cristovo era un mozo xigantesco que andaba buscando un señor poderoso a quen servir. Un día quixo axudar a un meniño a pasar un río pensando que era cousa doada, pero o neno pesaba tanto que houbo de afogar. Salvouno o propio neno, que non era outro que o neno Xesús. Exerce no cristianismo a función protectora do heroe mitolóxico grecolatino Heracles ou Hércules.

O navegante e descubridor Cristovo Colón (c. 1451-1506) foi o personaxe máis famoso con este nome; o seu lugar de nacemento segue a ser discutido, pois, ademáis de Xénova, desde hai máis dun cento de anos tamén se reivindica o berce galego, en San Salvador de Poio, na ría de Pontevedra.