Guía de nomes galegos

Nome evocador da morte de Cristo na cruz (do latín crux, crucis).

O nome procede da santificación da cruz ou madeiro sobre o que foi axustizado Cristo.

No mundo romano, a cruz era un instrumento de axustizamento público onde se levaban a cabo as execucións máis crueis. No cristianismo o culto á Vera Cruz (á ‘verdadeira’ cruz) ten a súa orixe na invención (‘descubrimento’) de santa Helena (século IV), nai do emperador Constantino, que peregrinara a Palestina e que, guiada por un ancián xudeu chamado Ciríaco, atopou o lugar preciso onde estaban enterradas as tres cruces do Gólgota (monte Calvario). Desde aquela os fragmentos da cruz de Cristo convertéronse nunha das reliquias máis apreciadas por catedrais, igrexas e santuarios.

O veterinario e enxeñeiro agrónomo vasco Cruz Gallástegui Unamuno (1891-1960). Instalado en Galicia a partir de 1921, foi pioneiro en Europa en experimentar cos híbridos do millo e impulsor da modernización da agricultura galega.