Antigo nome medieval prerromano, rexistrado con bastante frecuencia na documentación medieval galega desde o século X. Aínda que se ten proposto unha orixe íbera, é seguramente vasco, formado por ene ‘meu’ e o sufixo hipocorístico -ko. A mesma orixe ten Íñigo, resultante da castelanización do nome vasco (moderno Eneko). Tamén se ten posto en relación con Ignacio porque o santo de Loyola levaba orixinalmente o nome vasco, pero en realidade non ten relación etimolóxica con el.
