Guía de nomes galegos

Nome cristián, alusivo ao estado de gracia divina, procedente do latín in gratia 'en gracia'.

Santa Engracia de Zaragoza (séculos III-IV) forma parte do grupo dos chamados pola tradición cristiá “innumerables mártires de Zaragoza”. Parece ser que era filla dun nobre galaico de Braga. Posiblemente esta santa lendaria sexa unha personificación da graza de Deus. Outra santa con este nome seica era irmá de san Valentín, eremita coma el.

Engracia Vérez Puentes (1901-1983), mestra e escritora de Xermade.

Engracia Vidal Estévez (1930-2024), natural de Cambados, relixiosa e escritora en lingua galega. Movida polos aires renovadores do Concilio Vaticano II, desde os seus tempos de monxa xa adquirira un claro compromiso social a prol dos máis desfavorecidos. Foi pioneira na reivindicación feminista na Igrexa católica, manifestada en artigos e en libros como Por unha Igrexa tamén feminina (2000), publicación en que reclamaba a igualdade de xénero dentro da Igrexa, coa conseguinte admisión do sacerdocio das mulleres. Participou na fundación da revista de pensamento cristián Encrucillada —da que foi secretaria durante trinta anos— e noutras iniciativas relixiosas de signo progresista e galeguista do último terzo do século XX en Galicia, como a Romaxe de Crentes Galegos (1978), a revista Irimia (1978) e a Asociación Mulleres Cristiás Galegas-Exeria (1996).