Guía de nomes galegos

Do latín eclesiástico Thecla, do grego Thekla, derivado de Theókleia, nome persoal feminino, composto de theós 'deus' e kléos 'fama, gloria'.

Santa Tegra (séculos I-II), nobre doncela de Iconio (Asia Menor), pasa por ser a primeira muller mártir do cristianismo. Convertida por san Paulo, segundo a tradición foi denunciada polo seu prometido, a quen deixara, e sometida a innumerables tormentos pero acabou tranquilamente a súa vida en Seleucia.

O seu culto espallouse moi axiña: do seu santuario en Asia Menor fala a peregrina galega Exeria a principios do século V. É venerada tanto pola Igrexa grega como pola romana. É patroa de Tarragona, a onde chegou unha reliquia en 1320, e tamén recibe culto na Guarda, onde conta cunha ermida no alto do monte que leva o seu nome, cunha concorrida romaxe.