Guía de nomes galegos

Do latín rosarium 'roseira, xardín de rosas'. É un nome místico que alude a unha advocación mariana, Nosa Señora do Rosario, que ocupa o primeiro posto das advocacións marianas do século XIII. De uso principalmente feminino, foi levado en ocasión por homes.

Habitualmente considerábase que a devoción polo rosario xurdiu da suposta aparición da Virxe a san Domingos de Guzmán en 1213 en Albi (Occitania); outros atribúen a invención do rezo ao dominicano bretón frei Alano de Rupe (Alain de la Roche en francés), a fins do século XV.

A festa do Rosario foi instituída polo papa Pío V para conmemorar a vitoria de Lepanto contra os turcos (1571). Os frades dominicanos e franciscanos difundiron e impulsaron a devoción por esta Virxe nas súas misións parroquiais.