Guía de nomes galegos

Nome de orixe xermánica e procedencia francesa, a partir da forma Roger, e este composto polas raíces góticas *hroths ‘vitoria, gloria’ e ger, gar ‘lanza’.

A difusión do nome está vencellada, coma noutros casos, á literatura: na obra Orlando innamorato (1486) do poeta italiano Mateu Boiardo, Ruggiero é un guerreiro sarraceno que se converte ao cristianismo e casa con Bradamante, irmá de Rinaldo; tamén aparece no Orlando furioso (1505), continuación da obra anterior, neste caso de Ludovico Ariosto.

Houbo un san Roxelio no século IX, monxe mozárabe mártir en Córdoba, e outro do século XVI, abade dun mosteiro de Somerset (Inglaterra), executado por Henrique VIII.

Roger de Llúria (1245-1305) e Roger de Flor (1267-1305) foron dous mercenarios italianos que prestaron grandes servizos militares á Coroa de Aragón no Mediterráneo; o primeiro como almirante da frota e o segundo como capitán dos feroces almogávares.

O pensador inglés Roger Bacon (1214-1292), o actor inglés Roger Moore (1927-2017) e o barítono italiano Ruggero Raimondi (1941).  

En Galicia tivo sona Roxelio Pérez González (Rianxo 1897 - Pontevedra 1963), coñecido como ‘Roxerius’, mestre e pedagogo. Así mesmo, Xermán Roxelio Abella Chouciño, ‘Xelucho Abella’ (Malpica de Bergantiños, 1945 - Ponteceso 2024), teólogo, profesor, político e escritor en lingua galega.