Guía de nomes galegos

Do latín purificatio (ac. purificationem), de purificare 'purificar, expiar', formado de purus 'puro, limpo' e facio 'facer'. De uso principalmente feminino, foi levado en ocasión por homes.

Como nome feminino refírese á festa da Purificación de María, que tivo lugar, segundo o rito hebraico, corenta días despois do parto. Polo que conta a viaxeira galaica Exeria, tal festa xa se celebraba no século IV en Xerusalén.

En Occidente difundiuse desde o século VII para substituír as festas pagás en honor a Plutón. É a festa da Candeloria, que ten a súa orixe nunha procesión con candeas acesas que se facía antigamente en Xerusalén. O papa Xoán XXIII mudou a denominación desta festa en Presentación de Cristo no Templo.

Purificación de Cora y Más Villafuerte, fundador en 1908 de El Progreso, diario de Lugo.

A escritora ourensá Pura Vázquez Iglesias (1918-2006) foi a primeira muller que empezou a publicar en galego nos xornais e revistas de Galicia e da emigración galega despois da guerra civil; tamén foi pioneira, xunto coa súa irmá Dora, na publicación de obras en galego dedicadas ao público infantil e xuvenil.

Purificación Pazó Prado (n. 1871), mestra. Primeira concelleira en Galicia, nomeada en 1925 no concello de Moaña.

María Purificación Gómez González (1905-1986), alcaldesa da Caniza, a única da época da II República en Galicia; sería represaliada pola ditadura franquista.