Guía de nomes galegos

Do hebreo Rephâ'el, é un dos numerosísimos nomes teofóricos: o segundo elemento (-el) é a abreviatura dun dos nomes de Deus (Elohim), e o primeiro pertence á raíz verbal rapha' 'curar, sandar'. Polo tanto o seu significado é 'Deus sandou', entendido, claro está, en sentido metafórico: 'Deus sandou a miña dor' (e por iso se lle daba este nome ao fillo que nacía despois da morte doutro), ou 'Deus sandou os meus males, os meus pecados'.

San Rafael é un dos tres arcanxos que aparecen citados na Biblia, xunto con Gabriel e Miguel. Realiza a curación do pai e da muller de Tobías, segundo se conta no Libro de Tobías. Por ser compañeiro e protector deste na súa viaxe é considerado patrón dos viaxeiros.

O escritor Rafael Dieste (1899-1984), natural de Rianxo, honrado co Día das Letras Galegas de 1995.

O dirixente sindical Rafael Pillado Lista (San Cibrao, Cervo 1942 - Ferrol 2023), un dos líderes das protestas de marzo de 1972 en Ferrol contra a ditadura franquista.

A coruñesa Rafaela Hervada (1917-2010), licenciada en Dereito, converteuse en 1964 na primeira muller directora dunha emisora de radio en España (Radio Coruña), cargo que desempeñou ata 1989.

Raffaello Sanzio di Urbino (1483-1520), pintor renacentista italiano; Rafael Alberti (1902-1999), poeta español.