Do topónimo Compostela, e este do latín compos(i)tella, diminutivo de compŏsĭta, participio do verbo componere 'compoñer, enfeitar'; por tanto, o significado é 'a feitiña, a ben composta'. É paralelo a outros Compostela galegos (en Melide, Lobios e A Merca) e a Compostilla en español. Aparece na documentación polo menos desde o século IX (sancti Iacobi Compostellae ca. 846) e, por etimoloxía popular, foi asociado erroneamente a campus stellae 'campo da estrela', en referencia á estrela que guiou a Teodemiro ao lugar onde estaba o sepulcro do apóstolo.
