Guía de nomes galegos

O cognome romano Clemens (ac. Clementem) difundiuse na época cristiá e foi portado por papas, santos e mártires. O nome actual vén dunha variante Clementium. Na toponimia galega figuran tamén as variantes San Cremenzo de Pazos (parroquia de Zas) e San Crimenzo (lugar no Ézaro, Dumbría).

San Clemente foi un dos primeiros papas (92-101). De orixe xudía, a tradición di que foi san Pedro quen o converteu ao cristianismo. O emperador Traxano deportouno ao Quersoneso (Crimea) e condenouno a traballos forzados. É un dos santos máis antigos no culto hispánico (século VIII).

Houbo un total de catorce papas con este nome; o último, Clemente XIV (de 1769 a 1775).

A igrexa de Sant Climent de Taül, no Pireneo catalán, é un referente do primitivo románico peninsular, especialmente polas súas pinturas murais.

Klemens von Metternich ‘o príncipe de Metternich’ (1773-1858), político austríaco de orixe alemá que encabezou a internacional absolutista en Europa tras a derrota de Napoleón en Waterloo (1815). Foi un nome de estirpe na súa familia, pois impúxollo, de primeiro ou de segundo, a cinco fillos e a dúas fillas.

Clemente Antonio Fernández Sarela (1716-1765), arquitecto barroco compostelán, autor de obras como a Casa do Cabido (1758) da praza das Praterías de Santiago.