Guía de nomes galegos

Do latín conceptio (ac. conceptionem) 'concepción', do verbo concipio 'conter', e logo, a partir de concepire semina 'concibir, quedar preñada'.

A festa da Concepción xa se celebraba no século VIII, pero cun significado distinto ao de hoxe: festexábase que Xoaquín e Ana, estériles durante moitos anos, lograran ter unha filla, María, que sería nai de Xesús (festa da Concepción de santa Ana).

A finais do século XV empeza a xeneralizarse na arte sacra a iconografía da Inmaculada Concepción de María, inspirada nos atributos da muller descrita por san Xoán na Apocalipse. En 1660 a bula Sollicitudo ommnium ecclesiarum do papa Alexandre VII impulsa o culto a esta advocación da Virxe. O pulo máis recente deuse en 1854, cando o papa Pío IX publica a Ineffabilis Deus, onde se afirma como dogma que María estaba libre do pecado orixinal desde o mesmo momento da súa concepción.

A ferrolá Concepción Arenal Ponte (1820-1893), unha das pensadoras máis prestixiosas do século XIX, defensora dos dereitos da muller e dun sistema penitenciario humanitario. Xunto á tamén galega Juana de Vega promoveu unha asociación para visitar as mulleres presas. O seu labor tivo gran repercusión internacional.

A compostelá Concha Castroviejo (1910-1995) foi escritora, crítica literaria e xornalista.