San Pexerto de Buciños (Carballedo, Lugo) é un dos “santos novos” catacumbais galegos —como san Campio ou santa Minia— que reciben culto desde épocas relativamente recentes. Contra 1830 un eclesiástico natural de Buciños quixo favorecer a súa parroquia natal e conseguiu a doazón do corpo dun suposto mártir chamado Pexerto, extraído das catacumbas de san Calisto de Roma. Axiña se espallou o seu culto e mesmo se chegou a escribir un libro dos seus milagres. A súa sona chegou a Portugal por medio de emigrantes galegos, onde se denominou popularmente “o Santo da Galiza”.
