San Pantaión (séculos III-IV) era médico en Nicomedia de Bitinia. Debido ás súas curacións de carácter milagroso, os seus colegas pagáns denunciárano por cristián e acabou sufrindo martirio. É un dos santos máis antigos no culto hispánico (século VII). Parte do seu sangue disque se recolleu nunha ampola que chegou no século XVII ao convento madrileño da Encarnación, onde se asegura que se licúa cada ano.
Pantaleón y las visitadoras (1973) é unha novela do peruano Mario Vargas Llosa que sería levada ao cinema (1975 e 1999) e ao teatro (2009).
Nalgunhas comarcas galegas cando se cocía era costume facer o “bolo de San Pantaión”, que se lle daba ao primeiro pobre que pasaba despois de sacar o pan do forno.
