Guía de nomes galegos

Do nome persoal grego Néstōr, probablemente forma abreviada de Eunéstōr 'que regresa felizmente', composto de eu 'ben' e nóstos 'regreso, retorno'.

Néstor, na mitoloxía grega, era o máis novo dos fillos de Neleo e Cloris, o único que sobreviviu á matanza que de seu pai e irmáns fixera Heracles. Para compensalo, Apolo concedeulle a graza de vivir ao longo de tres xeracións; deste xeito, participou na loita entre os centauros e os lapitas, na expedición dos argonautas e na guerra de Troia. Na Ilíada e na Odisea, Néstor —rei de Pilos— é o prototipo do ancián prudente.

Houbo varios santos con este nome: san Néstor de Panfilia (século III), bispo mártir desta rexión de Asia Menor; san Néstor do Quersoneso (actual Crimea); san Néstor o Gladiador (século III), que foi decapitado polo emperador romano por vencer o seu gladiador favorito; san Néstor de Kíiv (século XI), monxe e cronista dun mosteiro da capital de Ucraína que colaborou nunha historia de Rusia (a Crónica de Néstor).

Néstor Carlos Kirchner Jr. (1950-2010) foi un avogado e político arxentino que exerceu como presidente da Arxentina entre 2003 e 2007.