Guía de nomes galegos

Do nome persoal romano Maurus, alcume étnico que significaba 'mouro', 'habitante da Mauritania' (actual Norte de África). É unha forma culta que se utilizou para castelanizar o nome Amaro.

San Mauro (c. 512-584) foi un monxe bieito de vida lendaria. Supostamente nacido en Roma, chegouse a identificar cun discípulo de san Bieito mencionado por san Gregorio. Pasa por ser o introdutor do monaquismo na Galia, onde fundou o mosteiro de Glanfeuil, hoxe en Thouriel, Maine-et-Loire, o primeiro da orde beneditina en Francia. En Galicia a Igrexa botou man deste santo para castelanizar santo Amaro o peregrino, pero nada teñen que ver un co outro.

Hai varias santas co nome de Maura: unha italiana de Rávena (século III) e outras dúas francesas: unha de Nogent-sur-Oise —parece ser que irmá de santa Bríxida— e a outra de Troyes, do século IX.

Fra Mauro (c.1400 - 1464) foi un cartógrafo veneciano creador, por encargo do rei Afonso V de Portugal, do mapa máis detallado e preciso do mundo ata ese momento, o mapamundi de Fra Mauro.